Luke 2

Yeisu yana tubui

(Madiu 1:15-25)

1Yoni yana hauga heda ainai ehebo tauwasawasa mwalaꞌina yehana Sisa Ogusito imiyamiya, na yana loina imwauwi ta ebe dalava ehebo ehebo tomowanao yehadi hileledi. 2Loina teina ivetuwuni haugana Kwiliniyo yana hauga vetauloina Siliya ainai. 3Ainaena tomowa maudoidi hilau dalava tamadiyai na yehadi nemai hileledi.

4Yosepa hinage Nasaletiyena itowolo neta Galili holanaena ta ilau Yudeya, Deivida yana dalava yehana Betelehem ainai wuwuna Yosepa iya Deivida yana huhu. 5Eena iya Meli ainai Yosepa hiwalo abiꞌabiyei baidana hilau ta ebe nemai yehadi hileledi, na Meli bada ihiumaꞌo. 6Haugana Betelehem ainai himiyamiya yana ahubena ilobaiya ta ilalabalabane. 7Na ilabalaba ta yana tautuwa towaho iꞌavalai na aleꞌo ainaena ihuma ta lagulagu yadi abaꞌai ainai imwamwauwine. Wuwuna vada taumana bada imwauꞌo, na nigele teya hinage tupwa vehabadi ta ainai hiꞌeno.

Sipi adi tauꞌita aviviniwo Yeisu hiboꞌeyei

8Na tupwanane ainai Sipi adi tauꞌita aviviniwo masigiliyena hihilahilawa na yadi sipiwone hiꞌitaꞌita avivinidi, 9na Bada yana tausagenawasa iveꞌaluwagavaidima na masele pigapigabuna ainaena maudoidi himeheuhi. 10Eeta tausagenawasane iwalo aulidi, iwalo, ‘Havena ammehemeheuhi, na hesi amyaliyaya, wuwuna wasa namwanamwana yavaiyama alimiyai na ainaena mata tomowa maudoina yadi abayaliyaya. 11Wasanane teina, wau masigiline Deivida yana dalavai Taulivahiwa bada itubuiꞌo iya Bada Yaubada yana Besinana towahona. 12Na ana abaꞌataiyede teina, iya gamanane aleꞌo ainaena hihuma na lagulagu yadi abaꞌai ainai iꞌenoꞌeno mata amlobai.’

13Maiꞌehebo na tausagenawasa bagibagilidi himahalava, tausagenawasanane baidadi Yaubada hinoꞌonoꞌowei, 14hiwalo, ‘Yaubada ewa aliliyai ta noꞌowei, na baleꞌuwai ana tauyemidiwo himiya daumwali’.

15Iꞌovi na tausagenawasaowa hilau gwaipile galewai, na sipi adi tauꞌita aviviniwone hibom aidiyai hiwalo, ‘Betelehem ainai talau ta ginauliwa iꞌaubabadaeiwa hola taꞌita’.

16Eeta himwayamwayau hilalaune, na Meli yo Yosepa na gamane lagulagu yadi abaꞌai ainai iꞌenoꞌeno hilolobaidine. 17Hiꞌita iꞌovi na gamane tamana yo hinana hiwalo aulidi hava dova tausagenawasa yana walo aidiyai gamane vehabana. 18Eena tupwadi tomowa wasanane hibenalei ta hiꞌaluwagavai moiha tauꞌitaꞌita sipiwone yadi aubabada vehabana. 19Na Meli walo maudoina inuwatuwu avivinidi ta vehabadi inuwanuwatuwu behabeha. 20Na tauꞌitaꞌita sipiwone hilau gwaipile na yadi walo vetuvehae ainaena Yaubada yehana hiꞌabiye mwalaꞌi, wuwuna tausagenawasane yana walomahalava aidiyai ana moiha hiꞌitayaꞌo.

Yeisu hilawei vada tapwaloloyai

21Wiki ehebo iꞌovi, ta gamane yana veꞌiveꞌilala neta tauna hihapi na yehana himwauwi Yeisu, iya mwalona tausagenawasa Meli imomoheine haugana howola nigele iyahiuma.

22Na mulitai Meli ana abiye masele ana ahubena ainai natunane ilawei Yelusalem habi moheina Bada ainai dova Mosese yana loina. 23Yaubada yana loina teina dova hilele, iwalo, ‘Hedaheda tautuwa towatowahodi amtalamwedi Bada ainai’. 24Na hinage yadi pwaoli Yaubada ainai hilawedi, dova yana loina imwauwi iwalo, ‘Yami pwaoli gabubu bwau bo natunatudi bwau’.

Simiyoni yana walo

25Hauganane Yelusalem ainai ehebo taubada yehana Simiyoni imiyamiya. Ibom towaho namwanamwana, na hinage Yaubada iveꞌahihiyei mwalaꞌina na ihaꞌwahaꞌwa Isileliwone adi livahi vehabana. Towahonane Aluꞌaluwa Veꞌahihi ainai imiyamiya. 26Na Aluꞌaluwa Veꞌahihi iveꞌita ebeha mata nigele iyamwalowoi ana higa Bada yana Besinana towahona iꞌita mugaiyei na abo imwalowoi. 27Na Aluꞌaluwa Veꞌahihi ivenuwamwauwei, ta Simiyoni iluluwune vada tapwalolo mwalaꞌina ainai, na Yosepa yo Meli gamane Yeisu hiꞌavalaiyama vada tapwalolo mwalaꞌina ainai, ta hava dova Mosese yana loina hiꞌawa abiyei. 28Simiyoni gamawa iꞌavalai ta Yaubada ainai iꞌaꞌawa yauwedo, iwalo:

29‘Yaubada yam waloyemidi aliguwai bada yalobaiyaꞌo, eeta teina taꞌi utalam ta mayagu yaliyaya yamwalowoi.
30Wuwuna yam livahine tomowa maudoidi vehabadi uꞌabinonovaiyaꞌo,
31teina ainaena umwamwau mahalavaeine bada meheguwena yaꞌitayaꞌo
32ta hiya ganamuli yadi masele, na ai yam bodao Isileliwone yama wasawasa vehabana.’
33Na tamana yo hinana hiꞌaluwagavai mwalaꞌina yana walowone natudine vehabana. 34Iꞌovi na Simiyoni iwalo velauwedi, na iwalo Meli ainai, iwalo, ‘Uꞌita gamane teina, Yaubada ivesinuwaei mata howola abo Isileliwo bagibagilidi iꞌabiye beꞌudi na bagibagilidi iꞌabiye towolodi na iya mata hinage iyemala veꞌiveꞌilala tomowa aidiyai, na tupwadi hiꞌawa oyaꞌoyamaei, 35eeta yadi nuwatuwu dawadawanidi imwau mahalavaedi. Na owa Meli mata yam nuwayababane dova elepa aleꞌaleha atem iwomali.’

Ana yana walo

36Tenem ainai ehebo tauwalo mahalava waihiuna imiyamiya, yehana Ana, iya Panuweli natuna, na hinage Ase yana huhu ehebo. Waihiunane bada iveꞌaiꞌaihaleꞌo, na mugai itawahola ta mwamwanena himiyamiya dova bolimai 7. 37Eena bada ihiwapeꞌo na imiyamiya bolimai 84 na hesi vada tapwalolo mwalaꞌina nigele iyalaulaugabai ahubena yo boniyai aidiyai, Yaubada iveꞌahihiyei na iꞌawaꞌawanoi yo ihudihudi. 38Hauga tenem ainai waihiunane ilaoma na Yaubada ainai iꞌawa yauwedo, na gamanane vehabana iꞌaubabada, iwalo, ‘Gamane teina Yelusalem ada Taulivahiwa tahaꞌwahaꞌwaine’.

Yadi wuyo Nasaleti ainai

39Eeta paihowa maudoina hiveꞌovidi hava dova Yaubada yana loina, na hilalau gwaipilene Galili, wuwuna hiya Nasaleti yadi dalava. 40Na gamane imwalaꞌi mayana wahiyala, na mayana hanapu, wuwuna Yaubada gamanane ivelauwei mwalaꞌina.

Gama Yeisu tauveꞌitao baidanao hiꞌauꞌaubabada

41Bolimai ehebo ehebo aidiyai Yeisu hinana yo tamana hihaehae Yelusalem, Buidiꞌwa guyauna vehabana. 42Na haugana Yeisu ana bolimai 12 ilobai baidadi hihahaene guyaunane ainai. 43Eeta guyaune iꞌovi na maudoidi hilaulau gwaipile yadi dalavai, na gamawa Yeisu Yelusalem ainai imiyamiya. Na tamana yo hinana nigele hiyahanapui, 44na yadi nuwatuwu ebeha iya bodaone holadiyai. Ainaena hilaulau ta imasigili, na Yeisu hibehabehaei yadi bodaone yo adi geluwo aidiyai, 45na nigele hiyalobai, ta hiwuyo Yelusalem hibehabehaei, 46na hesi nigele hiyalobai ana higa ahubena tonuga hiꞌovi, abo hilolobaine vada tapwalolo mwalaꞌina holanai, Yudeya yadi tauveꞌita baidanao ibenabenali aidiyai yo ipanipanivilaedi. 47Na yana maihao namwanamwadi yo dumwaludi hibenaledi, ainaena maudoidi hiꞌaluwagavai. 48Na haugana tamana yo hinana hiꞌita, hiꞌaluwagavai mwalaꞌina eeta hinanane iwalo, ‘Natugu, hava vehabana teina dova upapaihowaine, ta mayama nuwayababa tamamne baidagu abehabehaego?’

49Eeta Yeisu iwalo, ‘Hava vehabana ambehabehaegaune? Nigele amyahanapui neta Tamagu yana vadai yamiyamiya?’ 50Na tamanane yo hinanane nigele nuwadine iyamasele yana walone vehabana.

51Iꞌovi na baidanao hilau gwaipile Nasaleti, ta nemai yadi walowo imulitaedi. Na hesi hinanane ginauli teina vehabana inuwanuwatuwu mwalaꞌina. 52Na Yeisu imwalamwalaꞌi mayana hanapu na Yaubada iyaliyaya mwalaꞌina yo tomowa hinage dova hiyaliyaya ainai.